Vicente Ursua
Si Don Vicente Campos Ursua (Hunyo 15, 1859 Libmanan, Camarines Sur- Agosto 2, 1921, Calamba, Laguna), gobernadorcillo sa duwang termino kan Lbmanan poon 1891 asin koronel sa tropang Filipino na nagsabat sa mga mananakop na Amerikano kan 1900.
Pamilya
[baguhon | baguhon an source]An mga magurang niya iyo sinda Agaton Ursua asin Isidora Campos, na pareho namundag sa Libmanan, Camarines Sur.
An naagom ni Ursua iyo si Tecla Aureus y Ibarra na aki man kan mag'agom na sinda Agaton Aureus de los Angeles asin Lorenza Ibarra Santa Rosa y Rubio Fernando. Pareho namundag sa Lbmanan, sinda kinasal kan Hulyo 10, 1884 asin nagbunga an saindang pagsasaro nin duwang aki, si Jacinto asin si Perpetua. [1]
Kan rehimen nin Kastila asin pag'abot kan Amerikano
[baguhon | baguhon an source]Nasahotan na kaapil sa Katipunan asin rebelde, siya inaresto kan mga Kastila kan Oktubre 6, 1896. Nag'agi nin makuring kulog sa hawak huli ta kinadogkadog kan mga otoridad na Kastila. Kinadog siyang labilabi enot sa kumbento kan Simbahan nin Libmanan, dangan kairiba niya an pinsan niyang si Leon Hernandez asin an bayaw niyang si Pablo Perpetua, sinda pinirit pinalakaw haleng Libmanan pasiring sa Nueva Caceres. Sa kumbento kan Simbahan nin San Francisco, sindang tolo kinadogkadog naman. Nakasakay sa bapor na "Isarog", si Vicente pinadara na Manila, kasarabay kan iba pang nasahotan na mga rebelde, kun saen siya pigsentensyahan kan Concejo de Guerra na itapok sa Fernando Poo. Kan Pebrero 5. 1898 nagawadan siya nin indulto asin nakabalik sa Filipinas kan Nobyembre 12, 1898. [2]
Si Antonio Luna kinomisyon siya bilang teniente koronel na mamoon kan tropa regular kan Katipunan na sakop an Libmanan asin Daet. Dangan kaidto, komo saro nang koronel, siya an nagbilog kan Milicias Teritoriales kan Libmanan. An grupo niyang ini an suminabat sa madugong enkwentro laban sa mananakop na Amerikano kan an mga ini, kairiba an 2,200 na soldados, naglaog igdi sa Bicol paagi kan Sola' nin San Miguel, kan Pebrero 20, 1900 ta pasiringon sinda sa banwaan nin Nueva Caceres.
Kan nagin nang matoninong an Bicol, kan taon 1903, siya nanombrahan na juez de paz kan Libmanan.
Kagtogdas kan grupong Mason
[baguhon | baguhon an source]Siya sarong Mason asin katuwang si Juan Miguel, binilog an Logia Bicol Nu. 64 asin nagin siyang Worshipful Master natatago sa pangaran na "Virgilio". Naapod siyang "Gran Maestro Virgilio" kan GRAN ORIENTE ESPAÑOL, sinasabing siya an kagtogdas kan masoneria sa Ambos Camarines [3]
Nagadan siya sa edad na 62 sa Canlubang, Calamba, Laguna alagad an saiyang restos pinaghubo' kan taon 1926 sa Libmanan, Camarines Sur kun saen nakasaray sa mausoleo kan pamilya Ursua.
Toltolan
[baguhon | baguhon an source]- ↑ Tronco kan mga Ursua http://www.oocities.com/ursuatree/D4.htm
- ↑ pagsakit sa kamot kan kastila http://www.bicolmail.com/issue/2009/sept10/1896.html
- ↑ Tronco kan mga Ursua http://www.oocities.com/ursuatree/D4.htm
Mga panluwas na takod
[baguhon | baguhon an source]- Tronco kan mga Ursua
- The Bicol Martyrs of 1896 Revisited- ki Jose V. Barrameda, Jr. Bicol Mail. Jan. 15, 2008.[1]
- An retrato tinatao an kredito sa Ursua Family Website kun saen ini sinapi. (Okt. 5, 2009)- [2]
