Victor Corpus

Gikan sa Bikol Sentral na Wikipedia, an talingkas na ensiklopedya


Si Brigadier General Victor Navarro Corpus (namundag Oktobre 4, 1944) sarong retiradong Filipino opisyal militar asin opisyal pampubliko. Siya mas naoonabihan sa saiyang pagdeserto kan 1970 sa Pwersa Armada kan Filipinas (AFP) asin pag'apil sa New People's Army kan Partido Komunista nin Filipinas durante kan rehimen awtoritaryo ni Ferdinand Marcos,[1][2], dangan sa paglitik haleng NPA kan 1976, asin an pagbalik niya sa AFP paka pangyari kan People Power Revolution 1986,[3].

Kaapil sa Philippine Military Academy Class of 1967, siya nataas sa ranggo na Brigadier General kan Pwersa Armada kan Filipinas kan Abril 2003,[4] asin nagretiro na sa ranggong siring kan inabot niya an edad nin pagretiro kan Oktobre 2004.[5][6]

Kaamayi kan buhay asin edukasyon[baguhon | baguhon an source]

Si Corpus namundag kan 4 Oktobre 1944 sa San Pablo City, Laguna. An saiyang ama iyo si Col. Vicente Corpus na kaayon sa AFP Medical Corps. Kinua niya an elementarya asin sekundarya sa De La Salle University. Siya nagsali sa Boy Scouts; maray sa athletic, mahilig sa boksing asin track and field. Si Vic Corpus kaayon sa Acolyte Club asin nag'aasiste sa misa. Relihiyoso siya asin gustong magpadi, alagad sa pagpipirit kan saiyang ama, nag'entra siya sa Philippine Military Academy kan 1963.[7] Si Corpus nakatapos sa PMA na kabali sa klaseng "Dimasupil" kan 1967.[7][8]

Kan siya kadete pa sa Philippine Military Academy siya nagin myembro sa Kabataang Makabayan huli ta mayo pa man pigbabawal an pag'aapil sa organisasyon na ini. Igdi posible nakua niya an ibang mga paniniwala sa politika asin mga istoryang bakong marayrahay sa dangog kan gobyerno.

Karera[baguhon | baguhon an source]

Siya naglaog sa Philippine Army, kun saen nagresibe siya nin Airborne and Special Forces training. Dangan nagbalyo siya sa Philippine Constabulary. Disganado sa korupsyon nangyayari sa laog kan Pwersa Armada, nagpahubo siya sa PMA asin duman nagin instructor.[7]

Pagdukot sa PMA Armory kan 1970[baguhon | baguhon an source]

Kan 29 Desyembre 1970, si Corpus biglang nagdeserto sa Pwersa Armada kan Filipinas asin uminapil sa New People's Army. Siya an nagpakana' asin namayo sa pagdukot sa PMA armory. Pigtungod na bakasyon nin Pasko kun kasuarin nagpurule kadaklan kan mga kadete asin kan mga opisyales na haranglakaw kaiba an Superintendente na si General Ugalde ta naghale sa kampo ta sabaton si Presidente Ferdinand Marcos na mag'aaboton sa Baguio City.[9]

Mga nadukot na armas[baguhon | baguhon an source]

Si Corpus, na iyo an designadong opisyal sa aldaw, piggiya an tagasakyadang NPAng grupo asin nalalay nanggad asin naidulag an mga minasunod: 21 Browning Automatic Rifles, 11 carbines, .30 machineguns ammunition, 2,260 rounds kan .30 caliber tracer bullets asin 195 rounds nin ammunition para sa mga carbine.[10][11]

Bilang kaapil sa NPA[baguhon | baguhon an source]

Kan siya nabali sa NPA, an dinara niyang tagong-ngaran "Ka Erning". Siya an nadestino magkapot kan Personnel and Training Department kan Northern Luzon Regional Operational Command. Igdi napakinabangan niyang gayo an adal niya bilang opisyal asin instructor sa PMA. Si Ka Erning iyo na an namahala kan pageensayo asin pagtutukdo sa mga bagong naglalaog sa rebolusyon harale sa mga unibersidad, asin saro sa aktibistang kabali sa grupong taga-Mindanao iyo si Romulo Kintanar na ngapit nagin pamayo kan General Command kan NPA.[12]

Si Ka Erning asin an grupo niya natokahan magsabat asin mag'asiste sa sarong grupo man kan mga NPA na madoong sa Digoyo Point, Isabela ta sakay sa bapor na MV Karagatan may mga hakot-hakot na mga armas, mga kasangkapan sa komunikasyon, asin mga propagandang materyal haleng Tsina. Ini an tatarabangan kuta na madalhog sa pampang asin madara sa kakadlaganan na kuta kan NPA. Sa malas, nakaabot ini sa kaaraman kan gobyerno asin nabagat.[13]

Pagsuko 1976, mga kargo sa Gobyerno[baguhon | baguhon an source]

Huli ta dai niya nauyonan mga palakaw sa Patido Komunista kan Filipinas, si Corpus nagdesidir magsuko sa gobyerno kan 1976.[14] Si Corpus dinulok an sarong dating kaklase niya sa PMA na iyo an naglakaw kan pagsuko niya. Alagad, an rehimen ni Marcos pinaluwas na siya nadakop. Siya ikinunkon sa Military Security Unit sa Fort Bonifacio kun saen si agom niya nakakulong man. Dangan ibinalyo siya sa kulungan sa ISAFP. Duman kairiba niya si Senador Benigno Aquino Jr, asin si Bernabe Buscayno. Kuta an military commission sentensyado siyang putlan-buhay paagi nin badil kan 1977. Sampolong taon siyang napreso. Kan nagbagsak an diktaduryang Marcos kan 1986, si Presidente Corazon Aquino pinabutsan siya asin ginawadan indulto. Dangan siya naintegrar liwat sa Pwersa Armada komo Lieutant Colonel asin nakalaog sa Operations Staff. Siya an Pamayo kan Combat Research Office, 33, GHQ. Kan siya yaon igdi, si Lt. Col. Corpus nagsurat nin libro "The Silent War" na ini sarong sangkap na manwal kun paano magkondukta nin counterinsurgency operations laban sa mga NPA. Ini an binasehan kan nasyonal na estratihiya sa counterinsurgency na inapod "Oplan Lambat Bitag".

Pakatapos kan kargo niya igdi, siya nagkapot kan Task Force Panay, sarong AFP Task Force sa pagpahiwas-tanom nin kadlagan sa Isla nin Panay. Kan 1990, pinadara siya sa John F. Kennedy School of Government kan Harvard University kun saen pinaadal siyang Public Administration. Pamayo sa Intelligence Service kan AFP (ISAFP) kan siya nataas sa ranggong Brigadier General kan Abril 16, 2003.[15]

Si Corpus nagretiro kan 2004 pero nadesignar pa siyang Veterans Affairs Officer sa Embahada kan Filipinas sa Washington kan taon 2009.[16]

Hilnga/Basaha man[baguhon | baguhon an source]

Toltolan[baguhon | baguhon an source]

  1. "Ex-soldier to military, police: Serve the people, not the elite Inquirer News". https://newsinfo.inquirer.net/841354/ex-soldier-to-military-police-serve-the-people-not-the-elite. 
  2. "Ex-communist leader gets sentimental as divers find sunken ship" (in en). Gulf News Asia. https://gulfnews.com/world/asia/philippines/ex-communist-leader-gets-sentimental-as-divers-find-sunken-ship-1.1060318. 
  3. Mydans, Seth; Times, Special To the New York (1987-01-16). "Manila Journal; the Rebel Soldier Who's Never Without a Cause" (in en-US). The New York Times. ISSN 0362-4331. https://www.nytimes.com/1987/01/16/world/manila-journal-the-rebel-soldier-who-s-never-without-a-cause.html. 
  4. "Victor Corpus now a general". https://www.philstar.com/headlines/2003/05/10/205555/victor-corpus-now-general. 
  5. "Corpus out as ISAFP chief". https://www.philstar.com/headlines/2003/07/31/215537/corpus-out-isafp-chief. 
  6. "Victor Corpus retires at 60". Balitang Marino. Archived from the original on 2018-12-18. Retrieved 2018-12-11. 
  7. 7.0 7.1 7.2 David, Randy (August 12, 2001). "Public Lives: The silent wars of Victor Corpus". The Philippine Daily Inquirer. 
  8. Martial Law Files.[1] Kinua 10-09-21.
  9. Martial Law Files.[2] Kinua 10-09-21.
  10. Martial Law Files.[3] Kinua 10-09-21.
  11. https://www.philstar.com/opinion/2004/02/04/237549/lacson-vows-145there146s-no-turning-back-150-i-am-running-president146
  12. Martial Law Files[4]Kinua 10-14-21.
  13. Martial Law Files[5]Kinua 10-14-21.
  14. https://web.archive.org/web/20090807091110/http://www.nytimes.com/1987/01/16/world/manila-journal-the-rebel-soldier-who-s-never-without-a-cause.html, archived from the original on 2009-08-07  Missing or empty |title= (help)
  15. Inquirer.Net[6] Kinua 09-10-21.
  16. Martial Law Files.[7] Kinua 10-09-21.