Raul S. Roco Library
An Raul S. Roco-Naga Public Library sarong pampublikong libraryo kan Syudad nin Naga na namumugtak sa City Hall Compound sa kalabaan kan Abenidang Juan Q. Miranda, barangay Concepcion Pequeña. Ini ipinangaran ki dating Senador Raul S. Roco.
Uusipon[baguhon | baguhon an source]
An Camarines Sur Branch Library inot na pinagmukna kan Abril 1921 sa resolusyon kan Provincial Board kan Camarines Sur. Saro ini sa walong (8) library na itinugdas sa bilog na nasion. Nagsara ini kan Ikaduwang Gerang Pankinaban (1941-1945) alagad nagbalik sa serbisyo kan Abril 1, 1946. Ipinamahala sa Syudad kan Naga an library sa Resolution No.124 Series taon 1956, huli ta may bentahe an establesyimento sa mga taga-Naga.
Poon taon 1957 sagkod 1958, nagrenta nin edipisyo an Naga City Public Library sa Barlin Street. Taon 1979, an NCPL naglipat sa sarong edipisyo sa atubangan kan Plaza Rizal. Taon 1983, nakakua an NCPL nin bagong Bookmobile hali sa National Library, na nagserbi sa mga parabasa asin eskwela kan mga pampublikong elementaryang eskwelahan.Taong 1996, ini naging solamenteng pampublikong library sa Pilipinas na nagtao ning serbisyong Internet para sa saindang kliyente.
Kan November 18, 2004, naglipat ang library sa presenteng lokasyon sa laog kan City Hall Compound. An espasyo sa pagbasa makakasakop nin 500 na parabasa na may mga espesyal na probisyon para sa may mga disabilidad. Taong 2005, an Kagawaran kan Edukasyon (DepEd) nagpirma nin sarong Memorandum of Agreement para sa duwang taon nin administrasyon kan Library HUB na proyekto sa Syudad nin Naga. An library naging Regional Acess Point para sa proyektong Philippine E-Library sa Bicol kan National Library. Sa parehong taon, inilansar ang library website na nagtatao nin impormasyo sa saindang serbisyo asin programa kaiba na an online catalog.
An NCPL nagin Raul S. Roco Library kan Oktubre 26, 2005, an ika-64 na kumpleanyo kan dating Senador, sa Resolution No. 2005-079 kan Sangguniang Panglungsod kan Naga.Taong 2007, ini itinalaga kan Gobyerno nin Siyudad nin Naga asin Raul S. Roco Foundation bilang Secretariat sa Annual Regional Search para sa Raul S. Roco Youth Achievement Awards.[1]
