Padre Marcos Gomez

Si Padre Marcos Gomez-Almonacid y Garcia del Alamo (19 Desyembre 1872 Toledo, Espanya – 9 Hunyo, 1930 Manila, Filipinas) sarong pading prayle kan orden nin Franciscano na iyo an kagsurat kan “La Revolucion en la Provincia de Ambos Camarines" ta siya an saksi sa mga pangyayari sa Rebolusyon na ini. Siya nagin katuwang na padi sa Indan, Ambos Camarines kan taon 1898 kan magbungkaras an rebelyon kan mga Filipino sa Daet, Ambos Camarines 18 Abril, 1898 asta mag’alsa an mga Gwardya Sibil kan 18 Septyembre, 1898 sa Nueva Caceres, Ambos Camarines. Sa duwang madugong pangyayaring ini siya mismo nakasaksi asin nagin pa ngani siyang preso sa Seminario Conciliar de Nueva Caceres kairiba an 21 pang pading Franciscano ta pinakulong sinda igdi kan mga rebeldeng “Indyo” pinamayohan na Elias Angeles asin Felix Plazo.

Kaamayi kan buhay/karera

Namundag kan Des. 19, 1872, an mga magurang ni Gomez niyo sinda Luis Gomez Almonacid asin Tomasa Garcia del Alamo na mga residente kan Tembleque, probinsya nin Toledo, Espanya.

Si Gomez nagsulot kan habito nin Franciscano sa Pastrana, Guadalajara kan Septyembre 8, 1888. Sa Pastrana, siya nag'adal nin teolohiya sa Consuegra, dangan kan Ley Canonica sa Belmonte, Cuenca. An ordinasyon niya sa pagkapadi ginibo kan Agosto 30, 1896. Nag'aging Barcelona, siya nagpasiring Filipinas asin nag'abot sa Manila kan Oktobre 16, 1896. Siya nagdagos sa kumbento nin Nuestra Senora de los Angeles de Manila kun saen siya estudyante sa teolohiya moral. Dangan kaidto siya pigtokahan kan Probinsyal na si Padre Juan de Dios Villajos sa sarong paroko sa tuyong makaadal nin sarong dialekto asin nangyari ini kan Oktobre 24, 1897 na siya pigtoka sa Indan (Camarines Norte) kaiba duman an sarong padi na si Reb. Padre Toribio Martinez.

Durante kan saiyang toka sa Camarines Norte kan mangyari an pagbungkaras kan rebelyon enot sa Daet dangan suminunod sa Nueva Caceres. Ining pagsaksi niya sa mga sunod-sunod na pangyari saiyang isinurat sa manuskrito na saiyang inapod na "La Revolucion en la Provincia de Ambos Camarines," na an nasabing manuskrito ipinalis man sa Ingles ni Apolinar Pastrana Riol.

Maski siring an eksperensya niya igdi sa Bicol, siya dai nagpuli kundi ginustong magtener sa Filipinas. Kan Marso 24, 1904 nagin siyang presidente interim sa kumbento nin Paranas, Samar, asin kura paroko pa, dangan kan Abril parehong taon siya magpasiring sa Catbalogan, Samar. Kan 1908, siya natokahan kuta Guardian nin Manila, alagad dai niya inako an bagong toka kundi pasige siyang kura paroko sa Paranas, Samar. Igdi pirang taon nagsibot siyang mapahirahay asin mapagayon an simbahan asin kumbento igdi. Susog ki Padre Antonio Vasquez, si Gomez nagtener sa Paranas nin abot 20 taon. Kan 1923, siya natokahan na Comisario Provincial de Filipinas na may residensya sa Manila. Kan Nobyembre 13, 1926 si Gomez nagpaEspanya ta nag'atender sa Provincial Chapter duman alagad dai siya nata'wan trabaho huli sa maluya an salud niya asin igdi nagparahay ngona siya. Alagad, kan Enero 27, 1928 nagbalik siya sa Manila bilang parte kan Mision na kun saen siya an presidente.

Pero susog sa usipon kan sarong Padre Julian Cruz, si Gomez tina'wan katongdan komo Comisario Visitador kan Tertiary Order nin Sampaloc asin kan 1929, Guardian nin Manila. Sa Capitulo nin 1929, nasabi na siya nagkapot kan katongdan bilang Guardian kan Kumbento nin Nuestra Senora de los Angeles de Manila kun saen igdi na siya inabotan kan saiyang kagadanan kan Hunyo 30, 1930. Siya nagadan sa edad na 57 taon, 5 bulan asin 20 aldaw na an 41 taon, 9 na bulan asin 1 aldaw kaini yaon sa pagsirbe komo sarong naka-habitong Franciscano.