Plantilya:EnotnaDahon Artikulo

Si Obispo Francisco Gainza kan Nueva Caceres

Si Obispo Francisco Caracciolo Urreta Visayas de Gainza (3 Hunyo 1818 - 31 Hulyo 1879) an ika-25ng Obispo kan diocesis nin Nueva Caceres asín namundág sa syudad nin Calahorra, probinsya nin Logroño, Espanya.

Huli ki Obispo Gainza nahamán an Via Gainza, ngunyán Peñafrancia Ave.; napagayón asin napalakbáng an Seminario Conciliar de Nueva Caceres, ngunyán Holy Rosary Minor Seminary); asín natugdás an Colegio de Sta. Isabel, ngunyán Universidad de Sta. Isabel, an pinakainot na normal na eskwelahan para sa babaihan sa Filipinas. Uróg na pinagayón saká pinadakulà niyá an Santuario ni Ina, an Shrine of Our Lady of Peñafrancia na pinònan tugdokón asín hamanón sa ladrillo asín gapô ni Padre Miguel Robles de Covarrubias kan taon 1710. Siyá man an nagpatindóg kan banwaan nin Gainza, Camarines Sur. Kan taón 1873, nagpatugdók siyá nin saróng leprosarium (inapod Leprosarium ni San Lazaro) sa Palestina alagad iní narogbâ sa linog kan Abril 19, 1907. Siya nagtukaw bilang Obispo kan Nueva Caceres poón 1862 abót 1879.

Sarô pang kahamanán niyá na dakulaon na ambág kultural sa mga Bikolano iyó an pagpalagdâ niyá liwát kan Vocabulario de la Lengua Bicol na tinukdâ ni Padre Marcos de Lisboa. Iní pinaimprenta niyá otro kan taón 1865 sa Imprentahan kan Unibersidad kan Santo Tomas. Bakóng sadít na bagay man na inadalan niyáng husto an pagtarám asín pagsurat sa Bikol.