Sarung Banggi

An Sarong Banggi sarong kansyon Bikolnon na pigsurat ni Potenciano V. Gregorio Sr. kan Sto. Domingo, Albay kan 1897 pero an iba totoo (arog ki Merito B. Espinas) nakikiasusangan, tinokda' sana daa ini kan taon 1910.

An naglalakop kan kantang ini sa bilog na rona kan Bikol may tolong bersyon dawa ngane totoo an nakatala' sa plaka asin mga CD an duwang parapo sana an pirming pinapalaman.

Enot na Bersyon

SARUNG BANGGI (Ini an pirming nakarekord sa mga plaka/CD)

Sarung banggi sa higdaan

Nakadangog ako hinuni nin sarung gamgam;

Sa luba ko katorogan

Bako kundi simong boses iyo palan.

Dagos ako bangon si sakuyang mata binuklat,

Kadtong kadikloman ako nangalagkalag,

Si sakong pagheling pasiring sa itaas,

Naheling ko simong lawog maliwanag.

Ika-2ng Bersyon

SARUNG BANGGI

Sarung Banggi

Nakadangog ako nin huni nin sarong gamgam

Sa luba ko katurugan

Bako kundi simong boses iyo palan.

Dagos ako bangon si sakuyang mata binuklat

Duman sa kadikluman ako nangalagkalag

Aso mahiling ko duman sa itaas

Simong lawog naheling ko maliwanag.

Duman sa iraya bantog buayahan

Naglangoy ako sa makuring pu'ngaw

Dai ko pigheling an mga tentasyon

Maheling ko lamang an si'mong lalawgon.

Ika-3ng Bersyon

SARUNG BANGGI

Sarung Banggi sa higdaan

Nakadangog ako nin huni nin sarong gamgam

Sa luba ko katurugan

Bako kundi simong boses iyo palan.

Dagos ako bangon si sakuyang mata iminuklat

Duman sa kadikluman ako nangalagkalag

Aso mahiling ko duman sa itaas

Simong lawog naheling ko maliwanag.

Magpuon na ika ay sakong mamo'tan,

Nakaisip ako kun ano ang marhay,

Ta pati puso ko simo nang pinukaw,

Mahiling ka sana ay sakong ikauugma.

Huli sa paglakop kan kantang ini sa bilog na Kabikolan, may nadugang na mga parte asin mga tataramon na dai segurado kun an mga ini tunay na kabtang pa kan orihinal na komposisyon ni Potenciano Gregorio, Sr. Arog kan ika-duwang bersyon, an sa hurihan may nagdududa na katakin ini sa orihinal na kinompos niya. Siring man, an ika-3ng bersyon dai aram nanggad kun an ika-3ng parte katakin sa orihinal na tokda' ni Gregorio, Sr.

Igwa, alagad, si Merito B. Espinas na pinagrekord na saro pang bersyon kan Sarung Banggi. Ini nagluwas sa saiyang artikulo sa Bikolana (1979) na marereparo medyo may kaibahan sa tolong enot na bersyon. Idinoon niya nanggad na an ikatolong parte talagang tunay na kabtang kan orihinal. Ini an sinurat niya manongod sa bagay na ini:

An ikatolong parte, na an dakul naghuhuna bagong idinugang, sa totoo lang katakin kan orihinal. Ini pinatunayan ni Angeles Balasta Echaiuce (namundag- 1901) kan Libog, Albay, an nagin segundo maestro sa banda ni Potenciano B. Gregorio, Sr., an kompositor kan Sarung Banggi, asin ni Gerardo Mira Salazar (namundag- 1892) kan Tiwi, Albay, kaibahan kan si dainang kompositor sa Philippine Constabulary Band.

— The third part, which not a few presume to be a new addition, is acutally a portion of the original. This was confirmed by Angeles Balasta Echaiuce (b. 1901) of Libog, Albay, the one one time "segundo maestro" in the band of Potenciano B. Gregorio, Sr., the composer of Sarung Banggi, and by Gerardo Mira Salazar (b. 1892) of Tiwi, Albay, a colleague of the late composer in the Philippine Constabulary Band.

Sa siring na tinaram niya, boot niyang sabihon an pinaka-awtentikong "Sarong Banggi" na tunay na tinokda' kan kompositor iyo na ini:

SARUNG BANGGI

Sarung Banggi

Sa higdaan

Nakadangog ako

Hinuni nin sarung gamgam

Sa luba ko katurugan

Bako kundi simong tingog

Iyo palan

Dagos ako bangon

Si sakuyang mata

Iminuklat

Kadtung kadikluman

Ako ay nagalagkalag

Kasu ihiling ko si

Sakuyang mata

Sa itaas

Simong lawog

Nahiling ko maliwanag.

Kadtung kadikloman

Kan mahiling taka

Mamundo kong puso

Tolos na nag-ogma

Minsan di nahaloy

Idtong napagmasdan

Sagkod nuarin pa man

Dai ko malilingawan.

Kanogon ta natomtom an gabos na kopya kan mga komposisyon ni Potenciano Gregorio, Sr. kan masulo' (Enero 19, 1961) an enterong Li'bog, Albay (Sto. Domingo na ngonyan) asin nakadamay an gurangan nang harong ninda.

Kinanta sa Nasyon Unido

An daing-kagadanan na Sarong Banggi nabantog na sa luwas mala ta ini an pambukas na kanta sa pagtiripon kan Nasyon Unido Asambliya Heneral kan Hunyo 1950 duman sa Nweba York, Estados Unidos. Sarong Filipino, si Hen. Carlos Romulo iyo kaidto Pamayo kan nasabing Pagtiripon kan mga iba-ibang nasyon.

Sarung Banggi Festival

An banwaan nin Sto. Domingo (dati, Libog), Albay nagpasar kan Resolusyon Nu. 1, s. 2002 kan Enero 8, 2002 sa irarom kan administrasyon ni Alkalde Herbie Aguas na nagmukna' kan inapod na "Sarung Banggi Festival", sarong kapiyestahan sa pagromdom asin pag'ugma kan pagkamundag ni Potenciano Gregopio, Sr. asin kan saiyang tinukdang kanta na 'Sarong Banggi'. An selebrasyon nagpoon kan taon 2002.

Toltolan

• "GILOPEZ KABAYAO Plays Philippine Folk Songs", eBay Philippines, retrieved 2024-01-04 
• "Pilipinas! ng Sampaguita Cultural Troupe", eBay Philippines, retrieved 2024-01-04 
• "Parada Pilipino ng Malabon Brass Band", Discogs, 1974, retrieved 2024-01-04 
• "Parada Pilipino ng Malabon Brass Band", eBay Philippines, 1974, retrieved 2024-01-04 
• "Parada Pilipino ng Malabon Brass Band", eBay Philippines, 1974, retrieved 2024-01-04 

Mga ginunoan

1. Sarung Banggi: Bikol's Regional Song, by Merito B. Espinas. Bikolana Magazine. Vol. II, No. 1 (Sept. 16, 1979), page 23.

2. Sarung Banggi by Benjamin A. Claveria

3. Retrato kan nota kan Sarong Banggi sinapi' sa: Sarung Dolot Sa Satuyang Ina. Leonor R. Dy-Liacco.J & R Printing co., Inc. Parañaque, M. M. (1996?). p. 106.

Mga panluwas na takod

• Sarung Banggi - The Claveria Heritage
• Kantang ini pinadangog sa YouTube