Sarung Banggi

Gikan sa Bikol Sentral na Wikipedia, an talingkas na ensiklopedya
Jump to navigation Jump to search
An togtog kan kantang Sarong Banggi

An Sarong Banggi sarong kansyon Bikolnon na pigsurat ni Potenciano V. Gregorio Sr. kan Sto. Domingo, Albay kan 1897 pero an iba totoo (arog ki Merito B. Espinas) nakikiasusangan, tinokda' sana daa ini kan taon 1910.

An naglalakop kan kantang ini sa bilog na rona kan Bikol may tolong bersyon dawa ngane totoo an nakatala' sa plaka asin mga CD an duwang parapo sana an pirming pinapalaman.

Enot na Bersyon[liwaton | liwaton an gikanan]

SARUNG BANGGI (Ini an pirming nakarekord sa mga plaka/CD)


Sarung banggi sa higdaan
Nakadangog ako hinuni nin sarung gamgam;
Sa luba ko katorogan
Bako kundi simong boses iyo palan..


Dagos ako bangon si sakuyang mata binuklat,
Kadtong kadikloman ako nangalagkalag,
Si sakong pagheling pasiring sa itaas,
Naheling ko simong lawog maliwanag.

Ika-2ng Bersyon[liwaton | liwaton an gikanan]

SARUNG BANGGI


Sarung Banggi
Nakadangog ako nin huni nin sarong gamgam
Sa luba ko katurugan
Bako kundi simong boses iyo palan.


Dagos ako bangon si sakuyang mata binuklat
Duman sa kadikluman ako nangalagkalag
Aso mahiling ko duman sa itaas
Simong lawog naheling ko maliwanag.


Duman sa iraya bantog buayahan
Naglangoy ako sa makuring pu'ngaw
Dai ko pigheling an mga tentasyon
Maheling ko lamang an si'mong lalawgon.

Ika-3ng Bersyon[liwaton | liwaton an gikanan]

SARUNG BANGGI


Sarung Banggi sa higdaan
Nakadangog ako nin huni nin sarong gamgam
Sa luba ko katurugan
Bako kundi simong boses iyo palan.


Dagos ako bangon si sakuyang mata iminuklat
Duman sa kadikluman ako nangalagkalag
Aso mahiling ko duman sa itaas
Simong lawog naheling ko maliwanag.


Magpuon na ika ay sakong mamo'tan ,
Nakaisip ako kun ano ang marhay,
Ta pati puso ko simo nang pinukaw,
Mahiling ka sana ay sakong ikauugma.


Huli sa paglakop kan kantang ini sa bilog na Kabikolan, may nadugang na mga parte asin mga tataramon na dai segurado kun an mga ini tunay na kabtang pa kan orihinal na komposisyon ni Potenciano Gregorio, Sr.. Arog kan ika-duwang bersyon, an sa hurihan may nagdududa na katakin ini sa orihinal na kinompos niya. Siring man, an ika-3ng bersyon dai aram nanggad kun an ika-3ng parte katakin sa orihinal na tokda' ni Gregorio, Sr.


Igwa, alagad, si Merito B. Espinas na pinagrekord na saro pang bersyon kan Sarung Banggi. Ini nagluwas sa saiyang artikulo sa Bikolana (1979) na marereparo medyo may kaibahan sa tolong enot na bersyon. Idinoon niya nanggad na an ikatolong parte talagang tunay na kabtang kan orihinal. Ini an sinurat niya manongod sa bagay na ini: [1]

"The third part, which not a few presume to be a new addition, is acutally a portion of the original. This was confirmed by Angeles Balasta Echaiuce (b. 1901) of Libog, Albay, the one one time "segundo maestro" in the band of Potenciano B. Gregorio, Sr., the composer of Sarung Banggi, and by Gerardo Mira Salazar (b. 1892) of Tiwi, Albay, a colleague of the late composer in the Philippine Constabulary Band."

"An ikatolong parte, na an dakul naghuhuna bagong idinugang, sa totoo lang katakin kan orihinal. Ini pinatunayan ni Angeles Balasta Echaiuce (namundag- 1901) kan Libog, Albay, an nagin segundo maestro sa banda ni Potenciano B. Gregorio, Sr., an kompositor kan Sarung Banggi, asin ni Gerardo Mira Salazar (namundag- 1892) kan Tiwi, Albay, kaibahan kan si dainang kompositor sa Philippine Constabulary Band."

Sa siring na tinaram niya, boot niyang sabihon an pinaka-awtentikong "Sarong Banggi" na tunay na tinokda' kan kompositor iyo na ini-


SARUNG BANGGI


Sarung Banggi
Sa higdaan
Nakadangog ako
Hinuni nin sarung gamgam
Sa luba ko katurugan
Bako kundi simong tingog
Iyo palan


Dagos ako bangon
Si sakuyang mata
Iminuklat
Kadtung kadikluman
Ako ay nagalagkalag
Kasu ihiling ko si
Sakuyang mata
Sa itaas
Simong lawog
Nahiling ko maliwanag.


Kadtung kadikloman
Kan mahiling taka
Mamundo kong puso
Tolos na nag-ogma
Minsan di nahaloy
Idtong napagmasdan
Sagkod nuarin pa man
Dai ko malilingawan.


Kanogon ta natomtom an gabos na kopya kan mga komposisyon ni Potenciano Gregorio, Sr.. kan masulo' (1961) an enterong Li'bog, Albay (Sto. Domingo na ngonyan) asin nakadamay an gurangan nang harong ninda.

Kinanta sa Nasyon Unido[liwaton | liwaton an gikanan]

An daing-kagadanan na Sarong Banggi nabantog na sa luwas mala ta ini an pambukas na kanta sa pagtiripon kan Nasyon Unido Asambliya Heneral kan Hunyo 1950 duman sa Nweba York, Estados Unidos. Sarong Filipino, si Hen.Carlos Romulo iyo kaidto Pamayo kan nasabing Pagtiripon kan mga iba-ibang nasyon.[2]

Toltolan[liwaton | liwaton an gikanan]

  1. Sarung Banggi: Bikol's Regional Song, by Merito B. Espinas. Bikolana Magazine. Vol. II, No. 1 (Sept. 16, 1979), pahina 23.
  2. [http://adenu1980.blogspot.com/2010/07/sarong-banggi-remembered.html AdeNU 1980 Blogspot.com Kinua 4-10-16


Mga ginunoan[liwaton | liwaton an gikanan]

1. Sarung Banggi: Bikol's Regional Song, by Merito B. Espinas. Bikolana Magazine. Vol. II, No. 1 (Sept. 16, 1979), page 23.
2. Sarung Banggi by Benjamin A. Claveria
3. Retrato kan nota kan Sarong Banggi sinapi' sa: Sarung Dolot Sa Satuyang Ina. Leonor R. Dy-Liacco.J & R Printing co., Inc. Parañaque, M. M. (1996?). p. 106.

Mga panluwas na takod[liwaton | liwaton an gikanan]