Libreria y Imprenta Mariana

Edipisyo kan palagdaan ni Mariano Perfecto sa banwaan nin Naga, Libreria y Imprenta Mariana, mga taon 1890.

An dating kinamomogtakan kan Libreria y Imprenta Mariana, Philamlife na ngonyan (sa kanto kan Kalye Paz asin Kalye Peñafrancia

An Libreria y Imprenta Mariana sarong imprentahan na tinugdas ni Mariano Perfecto kan taon 1892 sa banwaan nin Naga, Ambos Camarines (ngunyan Syudad nin Naga). Nagpoon ini komo sarong tindahan nin libro dangan nagdugang nin imprentahan. Kan nagadan si Mariano Perfecto, saro sa tagapagmana niya, si Casimiro Perfecto, iyo na an nagpadagos asin nagpadakula kan negosyo sagkod na uminabot an mga Hapon kan taon 1941 sa Naga, Camarines Sur.

An imprentahan na ini iyo an nagpapalagda kan publikasyon na Sanghiran Nin Bikol poon 1927 abot 1931. Kan 1921, si Casimiro Perfecto pinònan mag-imprenta kan bersyon sa Bikol kan Almanaque Panayanhon na pigngaranan niyang Almanaque o Kalendariong Bikol sa Naga. Siring man, igdi naghahale an mga pinaimprentang mga relihiyosong mga kasuratan arog kan nobena, mga plusa, mga koridos, mga dotok, mga guhit Bikolnon, asin kun ano-ano pang mga sinururat manongod sa pagbabanal, pagdebosyon asin dapit sa simbahan Katoliko. Dakul kan mga publikasyon niya mga re-impreso kan mga tinokdâ ni Mariano Perfecto asin kan saiyang mga pinalís na obra haleng Kastila. An mag-agom na si Casimiro Perfecto asin Nicolasa Ponte Perfecto iyo an nag-asikaso kan imprentahan.

Namugtak an imprentahan sa kanto kan Via Gainza (ngonyan Penafrancia Ave) asin kan Paz St. na kaidto sarong eskinita sana alagad nagin tunay na kalye (ta nagtaong dalan an Arsobispado sa gilid kan saiyang solar). Nasulo ini kadamay an Palasyo kan Arsobispo kan mag-gera. Kan masulo ini, nagtogdas an saro sa trabahador kaini na si Gaudencio Cecilio pakagera (1946) kan Cecilio Press na haros pinadagos kun ano an mga iniimprenta sa Imprenta Mariana.

Pag'onabi dapit kan libreria

Kan si Simeon Paz nagsurat kan taon 1915 (Ethnography of the Bikol People) dapit kan mga bikolnon, naonabihan niya an imprentahan ni Mariano Perfecto. Sabi niya, "There is one library in the whole region known as Libreria de Mariano Perfecto. This library contains more or less 400 or 500 volumes, all written in the Bicol dialect. It is at Naga, Camarines. There are dramas, novels, folklore, awit, myths, the Passion, etc. These are sold at very low price...."

Hilingon man

• Imprenta de Nuestra Señora de Peñafrancia
• Imprenta de la Sagrada Familia

Mga hihilngan

• Bikol Collection. Prof. Maria Lilia Realubit. Filipiniana Section. UP Library. Unibersidad kan Pilipinas (An Retrato)
• Pahayag asin Osipon ni Milagros Perfecto Sanchez (Iloilo) Pebrero 2008 (aki ni Casimiro Perfecto)
• Almanaque Panayanhon 2008.
• Calendariong Bicol 1928. 1938. 1961.; 1962. 1963. 1969. 1970. 1975 (Retrato kan KB 1928 asin 1938 hale sa Bikol Collection ni Prof. Maria Lilia Realubit)