Engracio Perfecto
| Engracio Perfecto | |
|---|---|
| Kamundagan | Abril 6, 1952 Canaman, Camarines Sur |
| Relihiyon | Romano Katoliko |
| Agom | Corazon Balondo |
Si Engracio Nuñez Perfecto o midbid sa gahang "Engray" sarong Bikolanong pintor asin iskultor gikan sa Canaman, Camarines Sur na namidbid bilang pintor nin kartel sa Cine Bichara. Siya namundag kan Abril 6, 1952 sa mga magurang niyang si Dionesio Peñalosa Perfecto asin Juliana Nuñez. Napangagom niya si Corazon Balondo asin igwa sindang anom na aki asin siyam na makuapo.
Si Perfecto nagpoon magpinta sa Victor Bichara and Sons bilang pintor kan mga poster sa pelikula sa mga sinehan sa syudad nin Naga. Kan nagbublay an sine, siya naging sibot sa paghaman nin mga imahen nin mga santo. Alagad amay pa kan siya nagkahilig sa pagkurit. Gikan sa simpleng pamilya, inot niyang ipinahiling an talento gamit ka karaputol na crayon asin bolpen kan siya yaon pa sana sa ikatulong grado sa Canaman Central School hasta magtapos digdi kan 1965.
Dakulang impluwensya saiya si Jose Caudilla Pante na saro man na pintor asin iskultor kan barangay San Jose East sa Canaman. Nagin inspirasyon niya an mga obrang ladawan ni Pante na saiyang hinangaan bilang sarong huben na parakurit.
Nag-adal siya nin sekondarya sa Unibersidad kan Nueva Caceres nin sarong taon asin nagpondo huli sa pampinansiyal na rason. Urog na natais an saiyang talento sa pag-obserbar sa mga pintor kan Victor Bichara & Sons sa kalye Igualdad, ngunyan iyo an abenidang J. Hernandez, lambang udto. Mala ta dai siya minapuli tangani sanang madalan asin manodan an mga tamang timpla asin pahid nin pintura sa canvas. Digdi niya namidbid si Hele Miranda asin nagin siyang katabang-tabang kaini sa laog nin duwang taon na dai nin sweldo. Nagin padrino niya si Miranda tanganing makalaog siya sa Cine Bichara komo pintir nin kartel sa laog nin labi apatnapulong taon.
