Simbahan nin San Francisco

Gikan sa Bikol Sentral na Wikipedia, an talingkas na ensiklopedya
An Simbahan nin San Francisco sa Syudad nin Naga, Camarines Sur (2010)
An Simbahan nin San Francisco sa banggi (2012)

An Simbahan nin San Francisco namumugtak sa Syudad nin Naga, sa gilid kan Salog Naga asin kahampang kan parke nin Quince Martires. Ini mismo naghahanggilid sa Kalye Penafrancia Avenue.

An Simbahan tinugdas kan taon 1578 kan mga prayle kan Orden nin Fanciscano asin iyo ini an pinakaenot na simbahan sa rona' nin Bicol. Ini pirang beses nang nagaba huli sa bagyo asin nasulo' na entero kan Ikaduwang Gerang Pankinaban, asin kan panahon ni Obispo John Bernard MacGinley (nagtukaw, 2 Abril 1910 - 24 Marso 1924)[1], an Obispong ini ipinabakal an lugar asin raot na edipisyo kasabay kan 323-ektaryang lote sa sitio Palestina na namumugtakan kan ospital para sa mga leproso huli sa katikapohan kan diocesis.[2] Kan dai pa ini nasusulit bilang simbahan ini ginibong sinehan (Cine Zita). Kan taon 1957, an rugbang Simbahan asin lote kaini, binakal liwat kan Simbahan Katoliko, pinaghirahay asin pinagsulit bilang sarong tunay na edipsiyong simbahan para sa serbisyo kan arkidiocesis.

An simbahan man na ini nagin pailihan kan mga Kastila kan nagputok an Pag'alsa kan mga Gwardiya Sibil sa Nueva Caceres. Sobra sa 400 na mga Kastila patin na si Gobernador Vikcente Zaidin asin si Pamayo kan Gwardya Sibil na si Don Carmelo Navarro an nagtarago igdi sa laog kan simbahan hasta sinda napiritan magsuruko kan Septyembre 18, 1898 sa mga rebelde pinamayohan na kabo Elias Angeles asin Felix Plazo.[3]

Toltolan[baguhon | baguhon an source]

  1. https://www.catholic-hierarchy.org/diocese/dccrs.html. Kinua 10-02-22.
  2. Abella, Domingo. Bikol Annals Vol. 1. p 211-217, 1954. Kinua 10-02-22.
  3. Obias, Fernando Jose. INA on the record, p. 27. AMS Press. 1999.Kinua 10-04-22.