The Olivera Brothers

An magturugang na Olivera

An The Olivera Brothers o An Magturugang na Olivera sarong grupo nin mga parakantang magturugang. Sinda anas namundag asin nagdarakula sa Syudad nin Naga, Filipinas. An grupong ini nabilog kan taon 1986 asin an magturugang iyo sinda Jose, Cesar asin Allan Olivera. May beses an matua nindang tugang na si Danilo nabali sa grupo, asin komo quartet, an kapot niya piano o gitara.

An mga magurang ninda iyo sinda Laurente Olivera na namundag sa Tabuco, syudad kan Naga asin si Elisa Arteta, na namundag sa Tinago, Syudad nin Legazpi. Sampulo sindang magturugang na makangalas ta, maliban sa duwa (Nemesia asin Corazon), anas nagin mga propesyonal na mga parakanta. An sampulong ini iyo sinda: Nemesia, Danilo, Jose, Winifredo, Zenaida, Cesar, Corazon, Nelson, Allan asin Joel, na nasambit sa pasurunod na edad.

Bilang naggururang dara an pambihirang talento sa pagkanta, sinda nakaabot'abot na kun saen-saen sa pagpamalas asin paglinga sa rinibong mga paradangog paagi kan saindang nakakawiling mga awit, na sabi ninda, sobra sa sanggatos na kanta an yaon sa saindang repertoire.

Sa tataramon nin Ingles na mga kanta, magian na nadadara ninda an mga kanta kan Lettermen, an ki Tom Jones, Engelbert, Platters, Louie Amstrong, The Beatles, asin mga iba-ibang awit-banwa o folk songs arog kan dinadara na John Denver asin James Taylor asin iba pa.

Sinda sayod man na tataong mag'awit kan mga maririkas, nag'oro'olaptik na togtog kan mga kantang Espanyol arog kan Rancho Grande, Besa Me Mucho, Quien Sera, El Buro Su Carbon, Solamente, Eres Tu, asin La Ultimo Noche. Sinda man mahusay magtimplang kanta kan mga bantogan na awit Tagalog, klasikal o moderno.

Bilang bangot sa banggi, kun an saindang pinagkakantahan na lugar dakul bikolano o mga Bikolano, dai ninda nalilingawan ikanta an mga mapongaw na awit Bikolnon o idto man mga makangising mga kanta na dai nanggad nalihis na biyo naghaharakatak an mga paradangog ta nasasabotan tolos an mga patuya' o pasubang kahulogan kan kinakanta.

Sa linyada nin mga Kantang Bikol na harani sa puso nindang iti'yaw iyo an Boses ni Lolo, Sarong Banggi, Historia de Un Amor na nagigin Istorya kan Duwang Pagkamoot asin To all the Girls I Loved Before, na may makapupusngak na bersyon sa Bikol.

Sa saindang trio, gabos sinda mga vocalist na nagriribay'ribay sana sa pagkanta ngane dai manganaan an halanohan pero si Jose kapot an rhythm guitar, si Allan man an lead guitar asin si Cesar upright bass. Si Jose (na makangalas bisto man sa pangaran na George) may talento sa pagkantang huna mo naglilimogmog an boses, nagkakaga'ka', malagong asin hararom na garo ginogoyod.

Bilang trio na parakanta, naabot na ninda an Penang, Malaysia (nagkanta sinda duman sa Casuarina Hotel, apat na bulan, 1990), an Seoul, South Korea (nagkanta sa Hyatt Hotel, 1994-1995) asin sinda pabalik-balik sana sa Manila sa pagkanta sa mga resto bar arog kan Molave Cafe, Club Niwa, Buenelia Plaza Cafe. Dati regular sindang nagtotogtog sa Naga sa Lolo's Bar kun Domingo dawa totoo sige man an kanta ninda sa mga kasalan, mga espesyal na tiripon asin sa mga okasyon.

Ibang pang banda pinagmukna

Kan mas amay pang mga taon, 1972, an magturugang na Jose, Zenaida asin Winifredo nagbilog nin sarong banda na inapod nindang Supreme Conclusions. May lima pa sindang kaapil igdi na bako nindang mga tugang, alagad anas sinda mga Bikolano. Ini naghaloy na gayo asin nagkasiriblagan sana kan taon 1983. Bilang dakulang grupo, halawig na pabalik-balik sa Hapon sa pagtogtog pero sinda nakabase sa Olongapo.

Mga panluwas na takod

• Lolo's Bar - [1] Archived 2009-11-17 at the Wayback Machine.

Ginunoan

• Pahayag asin osipon ni Jorge asin Cesar Olivera. (Agosto 2009)