An Rehiyon Bikol (Ingles: Bicol Region o Region V) sarô sa 17 rehiyon kan Republika kan Filipinas. Sakop kaini an Bicol Peninsula sa sur-subangan kan isla nin Luzon asin mga isla kan Masbate sagkod Catanduanes. Inaapod man ining Bicolandia o Kabikolan. Sosog sa sensus kan 1 Mayo 2020, igwa ining 6,082,165 katawong nag-eerok digdi sa 1,207,809 kaharongan. Igwa ining sukol na 18,155.82 kilometro kwadrado.
An Peñafrancia Festival saróng rehiyonal na relihiyosong selebrasyon na nakasentro sa Syudad nin Naga asin ipigseselebrar sa Kabikolan asin manlaen-laen na parte kan kinàban. Ipigseselebrar iní sa kapiyestahan ni Nuestra Señora de Peñafrancia asin sarô iní sa pinakadakulà asin pinakapopular na relihiyosong okasyon sa nasyon.
Napoon an kapiyestahan sa Traslación na iyo an pagdakit kan ladawan ni Nuestra Señora de Peñafrancia halè sa Santuario ni Nuestra Señora de Peñafrancia, pasiring sa Metropolitan Cathedral. Siyam na aldaw an pagnonobena. Sa ika-siyam na aldaw ibinabalik giraray sa Santuario kan Peñafrancia sa Peñafrancia Basilica Minore kun saen tinatapos an nobenaryo. An pagbalik kan ladawan pinapaagi sa pagsakay sa salog Naga. Pig-aapod ining Fluvial Procession.
.jpg)
