Juan Triviño

Gikan sa Bikol Sentral na Wikipedia, an talingkas na ensiklopedya
Jump to navigation Jump to search

Si Juan F. Triviño (Mayo 18, 1917 - ?) iyo an ika-22 na Gobernador kan Camarines Sur. An katungdan niya komo gobernador nagpoon 1952 hanggan 1959. Siya an kagtugdas kan si peryodikong Balalong kan taon 1975 asin kan Academiang Bicol Siya man an saro sa mga nagporoon matindog an Nueva Caceres Colleges (ngonyan, University of Nueva Caceres).

Pamilya asin pag'adal[liwaton | liwaton an gikanan]

Si Juan Triviño namundag sa San Juan, Batangas, Filipinas. An mga magurang niya na sinda Numeriano Triviño asin Juana Goitis naghubo igdi sa probinsya kan Camarines Sur kan siya aki pang marhay. Kaya siya nagGrade I abot haiskul sa Camarines Sur High School. Nagkua siya nin abogasya sa Unibersidad kan Pilipinas, kun saen nakaklase niya si Ferdinand Marcos, asin nagtapos sa kursong ini, asta nakapasar sa Bar kan taon 1940.

Maray kuta an praktis niya sa pagka'abogasya alagad naputol pagputok kan Ikaduwang Gerang Pankinaban, bagay na nagtolod saiya na magbali sa gerilya sa lindong kan inaapod na PQOG, President Quezon's Own Guerilla. Sinasabi na siya sana an nagsayuma na magkua kan saiyang backpay. [1]

Karera[liwaton | liwaton an gikanan]

Kan magtapos an gera, nagtukdo siya sa Nueva Caceres Colleges (ngonyan, University of Nueva Caceres) sa College of Law. Natapsok siya sa politika kan pinakapot saiya an padalagan kan administrasyon kan probinsya ta nagkaigwa nin kumbensyon probinsyal kan taon 1951. Enero 1952, nagtukaw siyang bilang gobernador na elehido. Nanggana siya sa lindong kan Partido Nacionalista alagad an administrasyon naabtan niya iyo an ki Pres. Elpidio Quirino na sarong Liberal, bagay na masabi "bakong surumpay an tubo".

Paglaog niya, an probinsya nagsasapo nin dakulang deficit sa badyet alagad napara niya an deficit sa laog lang nin sarong taon pagtukaw niya.

Saiyang mga naginibohan[liwaton | liwaton an gikanan]

Manlainlain an saiyang magin ambag sa probinsya:[2]

  • lakopan na pagpakarhay kan mga raot na tinampo asin tulay sa mga munisipyo na nagtaong dalan kan marikas na pagdara kan mga produkto sa mga saodan;
  • pahirahay na maigot asin patogdok nin mga eskwelahan, mala ta napagayon na gayo an Provincial High School na nagtaong trabaho sa dakul na nangangaipo;
  • an higot na implementasyon kan minimum wage law.
  • tina'wa n niyang doon an pagpatalubo kan agrikultura kan probinsya asin dai pa ngane nin Slaughter Ban sa mga damulag, pigpangalad na niya an pagbuno kaini asin pagexportar o pagpaluwas kaini sa probinsya, lakdang na nagpadakul kan mga hayop na nagagamit sa pag'oma.
  • mga bomba sa irigasyon saiyang nahimo na matao sa mga munisipyuo na nangangaipo kaini, orog na sa mga banwaan nin Libmanan, Milaor, Minalabac, Bula, Pampplona, Canaman asin Caramoan. Mga patubig na ini nagpalangkaw asin nagpadoble kan hiwas nin tanoman nin paroy asin naglangkaw an produksyon kan probinsya.
  • sa pagsisira saiyang ibinawal an pagdakop sira kan mga darakulang basnigan sa Sola' kan San Miguel na ikinaogma kan mga saradit na parasira'.
  • Nalakaw man niya an Php 500,000 na ayuda haleng pondo kan Presidente ( si Pres. Ramon Magsaysay na, sarong Nacionalista) para sa mga patogdok nin edipisyo kan mga munisipyo sa probinsya. Mala ta Libmanan, Sipocot, Nabua, Caramoan, Pili, asin iba pa nanginabang na gayo sa gastoson na ini.

Huli ta "surumpay na an tubo", asin maray an pag'iribanan ninda na Trivino, asin kan mga ibang opisyales kan probinsya arog ki Finance Secretary Jaime Hernandez, Senador Edmundo Cea, Kongresista Emilio Tible, asin Felix Fuentebella, dakula an nagbulos na mehoras sa probinsya arog kan minasunod:[3]

  • nakua kan probinsya an mas dakulang kahirasan sa pondo nasyonal kumpara sa mga naenot na administrasyon probinsyal,
  • An ayuda hale sa FOA-PHILCUSA para sa pump irrigation systems, motor pool, ospital probinsyal, ngonyan Bicol Medical Center na, Camarines Sur Agricultural School, nag'abot haros sarong milyon na pesos, halagang dakulaon nanggad kan panahon na idto.
  • An hiras man kan probinsya gikan sa Ley Republika Nu. 1200, o Public Works Act of 1954-1955, nag'abot man sa halangkaw na halagang 7 milyon na pesos. [4]

Alagad, igwa pang mga nahaman siya na lingaw na an mga namamanwaan arog kan:[5]

  • pagpagayon kan Plaza Rizal
  • pagpalakbang asin pagpakarhay kan preso probinsyal na yaon sa likod kan kapitolyo kaidto (mayo na ini pareho)
  • responsable siya sa pagpatogdok kan edipisyo kan Philippine National Bank kan siya nagin direktor kaini, asin kan panahon kan administrasyon ni Pres. Ferdinand Marcos. Hanggan ngonyan, sa limang eskalon kaini, iyo pa an pinakahalangkaw na edipisyo sa siyudad nin Naga.

Kan siya may imprentahan para sa Balalong, tinugdas niya an Academiang Bicol, asin pighingowa kan kaayonan na ining minukna niya, na mapakarhay asin mapatalubo an literaturang Bikolnon. Mala ta siya mismo may kolum sa Balalong na Bicolon Ta Sana. Sa maugmang pakiramas niya sa kapwa Nagueño, nagbilog siya nin sarong klab, an Jardin Club na binabalihan nin mga lataw na personalidad sa siyudad.[6]

Mga panluwas na takod[liwaton | liwaton an gikanan]

Toltolan[liwaton | liwaton an gikanan]

  1. Buhaybuhay niya Hon. Juan F. Triviño: An Appraisal. Luis G. Dato. Bicolandia. Des. 25, 1954. p. 42
  2. Hon. Juan F. Triviño: An Appraisal. Luis G. Dato. Bicolandia. Des. 25, 1954. p. 42
  3. Hon. Juan F. Triviño: An Appraisal. Luis G. Dato. Bicolandia. Des. 25, 1954. p.43
  4. Mga naginibohan Hon. Juan F. Triviño: An Appraisal. Luis G. Dato. Bicolandia. Des. 25, 1954. p.43
  5. Mga hinaman Hon. Juan F. Triviño: An Appraisal. Luis G. Dato. Bicolandia. Des. 25, 1954. p.43
  6. Eleksyon sa Jardin Club, Balalong. Des. 6, 1977
Selyo kan Provincia kan Camarines Sur
Mga Gobernador kan Camarines Sur
George CurryJames RossJuan PimentelMariano AbellaMariano PerfectoMariano FuentebellaJose FuentebellaAndres GarchitorenaManuel CresciniRamon Felipe, Sr.Julian OcampoGerardo CeaPaz Cea de Conde * Ramon ImperialManuel Del GallegoIgnacio MelitonMariano VillafuerteMariano GarchitorenaGabriel PrietoJose Del GallegoJuan TriviñoApolonio MalenizaArmando ClederaFelix AlfelorFelix FuentebellaJose BulaongLuis Villafuerte, Sr.Luis Raymund Villafuerte, Jr.Miguel Luis Villafuerte