Carlos Arejola

Gikan sa Bikol Sentral na Wikipedia, an talingkas na ensiklopedya
Jump to navigation Jump to search
Carlos A. Arejola
Carlos Arejola.jpg
Minundagan(1961-05-31)Mayo 31, 1961
KagadananHulyo 20, 2017(2017-07-20) (edad 56)
KasibotanEmpleyado, paratukdô, parasurat
NasyunalidadFilipino
LahìBikolano
GenreDula sa telebisyon, tula
Bantog na giboSayod Kong Tataramon/Tuwiran Kong Sasabihin (2009)
Mga bantog na gawadGawad Pagromdom ki Carlos Palanca para sa Literatura

Si Carlos "Carlo" Apuan Arejola (namundag, Mayo 31, 1961 - nagadan, Hulyo 20, 2017) sarong kagubay na Bikolanong parasurat asin premyado kan Gawad Pagromdom ki Carlos Palanca para sa Literatura sa saiyang Ang Mundo ay Iisa at Marami sa Kategoryang Screenplay sa Filipino. Kan Agosto 2009, pigbungsod an libro niyang Sayod Kong Tataramon/Tuwiran Kong Sasabihin.[1] Nagmukna siya nin mga proyekto na nagtutulod sa padagos na pagrambong kan literatura, tataramon, asin kulturang Bikol.

Bilang parasurat asin direktor[liwaton | liwaton an gikanan]

Premyado si Arejola sa 2006 Gawad Pagromdom ki Carlos Palanca para sa Literatura, 2003 Gawad Komisyon sa Wikang Filipino, asin sa 2002 Homelife Poetry Prize. Nagin finalista an saiyang librong Sayod Kong Tataramon/Tuwiran Kong Sasabihin sa 10th Madrigal-Gonzalez Best First Book Award kan 2010. An nasabing katiriponan nin mga pasaling pan-entablado asin pan-pelikula nakasurat sa tataramong Bikol asin Tagalog/Filipino asin pigpublikar kan Nasyunal na Komisyon kan Kultura asin Arte (NCCA) kan 2009. An nasambit na libro iyo an kainot-inoting katiriponan nin mga pasaling pan-entablado na napublikar sa rehiyon Bikol.

Siya man an kagsurat kan Wala Akong Bitbit na Sawiang Puso Tuwing Naglalakbay (libro nin mga tula sa Tagalog/Filipino, Ateneo de Naga University Press, 2015), kan librong pan-aki na Si Miriam asin an Saiyang Samhod, Panlampaso, Pantrapo, asin Panhakbot nin Ati. An librong pan-aki nakasurat sa Bikol, Ingles asin Tagalog/Filipino, pigpublikar kan Goldprint Publishing House kan 2012, asin parte kan trilohiya nin mga librong pan-aki na Boom, Boom, Boom An Mga Aki kan Camarinezoom. Nagin editor man siya kan Yudi Man Mga Osipon para ki Nunuy asin ki Nini (NCCA, 2009), antolohiya nin mga osipon na pan-aki na nanggarana sa Premio Tomas Arejola para sa Literaturang Bikolnon (PTALB) na saiyang pigtugdas kan 2004. An saiyang rawitdawit na Komprada Katedral napublikar sa librong Sagurong: 100 na Kontemporanyong Rawitdawit sa Manlain-lain na Tataramon Bikol (DLSU, 2011).

An saiyang mga panurat nagluwas na sa mga antolohiya kan Unibersidad kan Pilipinas, Society of St. Paul, Sentrong Pankultura kan Pilipinas (CCP), Mindanao State University-Iligan Institute of Technology, University of San Agustin asin sa mga antolohiyang Bikol siring kan Burak asin An Tambobong nin Literaturang Bikolnon.[2][3][4] Nagluwas man an mga ini sa mga bantog na babasahon arog kan Philippine Panorama, Philippine Free Press, asin sa mga teksbuk na pan-sekondarya asin pan-kolehiyo.

Napili an mga tula ni Arejola na ibali sa Aklat Likhaan ng Maikling Kuwento at Tula, an antolohiya na naglilista kan mga pinakamabansay na panurat sa Pilipinas asin pigpupublikar kan Likhaan: Creative Writing Center kan Unibersidad kan Pilipinas. Nakabali an mga panurat ni Arejola sa Aklat Likhaan kan taong 1995, 1996 asin 2001.

Nagin Writing Fellow siya sa UP National Writers Workshop kan 1998 asin Iligan National Writers Workshop kan 2000.

Pangkulturang paghiro[liwaton | liwaton an gikanan]

Si Arejola iyo an kagmukna kan Premio Tomas Arejola para sa Literaturang Bikolnon asin kan Juliana Arejola-Fajardo Workshop sa Pagsurat Bikol, mga inisyatiba na pigmidbid kan 2007 Mayoral Recognition Award kan Siyudad nin Naga asin kan Unyon ng Manunulat sa Pilipinas (UMPIL) kan 2008.

Si Arejola nagin representante kan Sur nin Luzon sa Nasyunal na Komite sa mga Arteng Panliteraturang Arte (NCLA) asin iyo an tagapamayo kan Arejola Foundation for Social Responsibility na nagpapadalagan kan Juliana Arejola-Fajardo Workshop sa Pagsurat Bikol, Premio Tomas Arejola para sa Literaturang Bikolnon sagkod Cry of Resistance Outreach Program.[5][6][7] Duwang termino siyang naeligir na representante sa NCLA, poon 2008 sagkod 2013, asin naeligir man na ikaduwang sekretaryo sa nasabing komitiba. Sa panahon na ini pigtugdas ni Arejola an Pintakasi kan Literaturang Bikolnon, an taonan na pagtiripon kan mga parasurat kan rona lambang Pebrero bilang pagselebrar kan Philippine Arts Month. Sa saiyang termino man sa NCLA napublikar an enot na mga libro kan Bikolanong parasurat arog ka Merlita Lorena Tariman, Jose Jason Chancoco, Honesto M. Pesimo, Jr., Aida Cirujales, asin Lourdes Nava Nieva, Ph.D.

Nakipagtabangan man siya na manlainlain na grupo sa pagpadalagan kan Bikolinismo Outstanding Bicolano Artist Search, Gipaw Rapu-Rapu Arts Camp sa Rapu-Rapu, Albay, Pagtukdo-Pagsurat Bikolnon: Teachers-Writers Conference, Bukambibig Literary Performance Series, asin pirang pang mga importanteng inisyatiba, dahilan kun tano inaapod si Arejola na “poster boy of Bikol literature” sa mga nasyunal na pagtiripon na pan-literatura.

Nagin tagapagtaram si Arejola sa Philippine PEN Congress, Taboan: The Philippine Writers Festival, asin sa mga akademikong pagtiripon sa manlaen-laen na lugar kan Pilipinas, kaiba an mga pagtiripon kan College Editors Guild of the Philippines, DepEd, DILG, Kasanggayahan Heritage Lecture, asin iba pa. Siring man, nagin tagapagtaram siya sa Indictment of Child Labor by the Arts, sarong forum na pinadrinohan kan Center for Civil and Human Rights kan 2013 sa University of Notre Dame sa Indiana sa Estados Unidos.

Siya man an nagmukna kan Pili Banwaan Ko, Padangat Ko Cultural Heritage Society (PBKPKCHS) asin iyo an presenteng tagapamayo kaini. Pira sa mga inisyatiba kaini iyo an Dai Magin Dai Sa Sadiring Banwaaan Pili Pride Tour, an George Curry Lecture Series, asin an Pili Cultural Mapping Project. Tinawan an PBKPKCHS nin Pili Mayoral Recognition Award kan 2015. Siya nagin kaapil kan Kabulig Bikol Writer's Association asin Sumaro Bikolnon, Philippine Center of the International PEN, Unyon ng mga Manunulat sa Pilipinas, asin Child Labor Education Task Force (CLETF).

Pagkagadan[liwaton | liwaton an gikanan]

Si Arejola bigla an pagkagadan atake sa puso kan agang petsa 20 nin Hulyo sa Pili, Camarines Sur. [8]

Mga Osipon na Pan-aki[liwaton | liwaton an gikanan]

Toltolan[liwaton | liwaton an gikanan]

  1. Bikol Literary Titles to be Launched on August 15 Vox Bikol (pighugot 2009-08-19)
  2. Ani nin mga Rawitdawit An Tambobong nin Literaturang Bikolnon, Tomo 1 Blg. 1 Canaman Cam. Sur (Marso 2010)
  3. Mga Yawit-yawit sa Tig-init An Tambobong nin Literaturang Bikolnon, Tomo 1 Blg. 2 Canaman Cam. Sur (Hulyo 2010)
  4. Mga Awit para sa Ina An Tambobong nin Literaturang Bikolnon, Tomo 1 Blg. 3 Canaman Cam. Sur (2011)
  5. Retired UP professor leads 'Premio' honores Bicol Mail (Pighúgot 2009-08-26)
  6. NCCA Sponsors Playwriting Workshop at Ragay, Camarines Sur Vox Bikol (pighugot 2009-09-05)
  7. 7th Pagsurat Bikol to honor Vincentian Schools' founders Vox Bikol (pighugot 2015-6-11)
  8. Bicolano writer Carlos Arejola passes away www.bicolstandard.com Kinua 07-21-17
Suminunod ki
Rudy Alano (Representante kan Bikol)
Representante kan Sur nin Luzon
sa Nasyunal na Komisyon para sa Kultura asin kan Arte
para sa Nasyunal na Komite sa mga Arteng Panliteratura

2007 – 2010
Sinundan ni
Francisco Peñones, Jr.‎