Elbert Baeta

Gikan sa Bikol Sentral na Wikipedia, an talingkas na ensiklopedya
Elbert O. Baeta
Si Baeta sa UPD Vargas Museum
MinundaganPebrero 24, 1991
Syudad nin Iriga, Camarines Sur
KasibotanParatukdo, parasurat
NasyunalidadFilipino
LahìBikolano
Alma materSentral na Bikolanong Unibersidad nin Estado kan Agrikultura (CBSUA)
GenreRawitdawit, usipon
Bantog na giboGapo: mga rawitdawit (Parasurat Bikolnon, 2016)

Si Elbert Olaso Baeta (namundag sa Syudad nin Iriga, Camarines Sur) sarong kagubay na Bikolanong parasurat nin mga rawitdawit sa tataramon Rinconada Bikol, Bikol Sentral sagkod Filipino asin kagsurat kan librong Gapo: mga rawitdawit (Parasurat Bikolnon, 2016 asin 2017) asin Huli ta Labi Kita Kananok (Parasurat Bikolnon, 2020). Sarô siyang paratukdô sa Camarines Sur Polytechnic College sa Nabua, Camarines Sur asin nagtukdô man siya sa Central Bicol State University of Agriculture (CBSUA) sa Pili, Camarines Sur.[1]

Siya an nagin pamayo kan Parasurat Bikolnon kan 2018 asin board member kaini sa presente. Siya kaapil man kan Kabulig-Bikol.

Nagkua siya nin units sa Maestro sa Lengwahe asin Literature sa Ateneo de Naga na Unibersidad sa syudad nin Naga asin ngunyan nagpapadagos kan saiyang pagkua nin Maestro kan Arte sa Literatura sa Unibersidad kan Santo Tomas sa Manila bilang sarong iskolar kan Commission on Higher Education.

Pagsurat[baguhon | baguhon an source]

Nakaresebe si Baeta nin fellowship sa Juliana Arejola-Fajardo Workshop sa Pagsurat-Bikol sa Syudad nin Naga kan taon 2012. Nagin kaapil siya kan Parasurat Bikolnon kan Nobyembre 11, 2012 kun sain nagin siyang panelista sa ginibong Saringsing Writers Workshop kan 2013.[2] Kan 2015, saiyang pinadalagan an workshop na ginibo sa Palestina, Pili, Camarines Sur. Kan 2016, nakabali sa halìpot na lista an saiyang katiriponan nin mga rawitdawit sa Premyo Tomas Arejola sa Literaturang Bikol. Nag-atendir man siya sa pinakainot na Saling-Panitik Bienvenido Lumbera Translation Seminar-Workshop poon Pebrero 8-10, 2018 asin Gemino H. Abad Seminar-Workshop on Teaching Literature poon Setyembre 20-22, 2019 na parehong ginibo sa Unibersidad kan Filipinas, Diliman, Syudad nin Quezon.[3][4][5]

Sa ginibong Rimpos: art-literature Exhibition kan Salingoy Art Group, katampad kan mga obrang kurit ni Lea Uvas an saiyang mga rawitdawit. An aktibidad ginibo sa Naga City Art Gallery sa Jesse M. Robredo Coliseum poon Mayo 4 sagkod 18, kan 2013. Nagpaluwas nin sarong libro na pinakarhay ni Eilyn Nidea laman an haralìpot na saysay dapit sa mga parakurit asin parasurat na kaayon sa aktibidad siring man an mga ladawan asin mga panurat na ipinahiling sa eksibit.[6][7]

Nagluwas siya kan saiyang pinakainot na libro na igwang titulong Gapô na katiriponan nin mga rawitdawit sa Bikol Sentral, Rinconada Bikol asin piling Tinagalog na rawitdawit. Nagluwas man sa parehong taon an saiyang rawitdawit na igwang dakitaramon sa Filipino sa Ani 39 kan Cultural Center of the Philippines (CCP). Sarô an saiyang rawitdawit sa nagluwas sa Girok: erotika, an pinakainot na antolohiya nin mga erotikang Bikol na pinublikar kan Kabulig-Bikol taon 2017 asin sa Bikol BKL/Bakla kan 2019.

Kan 2020, an Parasurat Bikolnon nagpublikar nin anom na libro sa saindang Writers Series kaiba an mga panurat niya asin ninda Eilyn Nidea, Edwin Breva, Jr., Froy Beraña, Jerome Hipolito, asin Jerome Hipolito sa mga tataramon na Bikol Sentral, Rinconada Bikol, asin Filipino/Tagalog.[8]

Kataytayan nin mga ladawan[baguhon | baguhon an source]

Toltolan[baguhon | baguhon an source]