Irmina Torres

Gikan sa Bikol Sentral na Wikipedia, an talingkas na ensiklopedya

Si Irmina Volante-Torres sarong kagubay na Bikolanang pintor, premyadong parasurat sa mga tataramon na Bikol Sentral sagkod Rinconada Bikol asin sarong stenographer sa Camarines Sur. Siya sarô sa mga kagmuknâ kan Hagkos Bikolana, sarong grupo nin mga babaing parasurat sa Camarines Sur.[1] Kagsurat man siya nin sarong librong pan-stenograpiya. Nagtapos siya nin Law sa Unibersidad kan Nueva Caceres. Nagkukua siya ngunyan nin Master of Arts sa Language and Literature (MLLP) sa Ateneo de Naga na Unibersidad sa Syudad nin Naga.

Siya nagin partisipante sa Juliana Arejola-Fajardo Workshop sa Pagsurat-Bikol asin sa 9th Lamiraw Creative Writing Workshop sa Syudad nin Calbayog, Samar kan taon 2012. Sarô siya sa mga panelista sa Ika-3 Saringsing Writers Workshop: Hunglonan nin Parasurat Bikolnon na pinadrinohan kan lokal na gobyerno kan Syudad nin Naga kan 2013 asin kan Sentral na Bikolanong Unibersidad nin Estado kan Agrikultura (CBSUA) kan 2014.[2]

Kan 2013, kabali an saiyang halìpot na usipon na Sari na si Sarina? sa antolohiyang Hagong: Mga Osipon na pinakarhay ninda Paz Verdades Santos asin Francisco Peñones, Jr.[3] Mantang sa ginibong Rimpos: art-literature Exhibition kan Salingoy Art Group, katampad kan mga obrang kurit ni Lorna Margate an saiyang mga rawitdawit. An aktibidad ginibo sa Naga City Art Gallery sa Jesse M. Robredo Coliseum poon Mayo 4 sagkod 18, kan 2013. Nagpaluwas nin sarong libro na pinakarhay ni Eilyn Nidea laman an haralìpot na saysay dapit sa mga parakurit asin parasurat na kaayon sa aktibidad siring man an mga ladawan asin mga panurat na ipinahiling sa eksibit.[4][5]

Toltolan[baguhon | baguhon an source]