Marvin Aquino

Gikan sa Bikol Sentral na Wikipedia, an talingkas na ensiklopedya
Marvin Davila Aquino
MinundaganTinambac, Camarines Sur
KasibotanParasurat, paratukdô
NasyunalidadFilipino
LahìBikolano
GenreRawitdawit, nobela

Si Marvin Davila Aquino na tubong Tinambac, Camarines Sur sarong paratukdô, parasurat asin an kagsurat kan Alunsina Kan Dagat sarong nobela na napili bilang pinalista sa Premyo Valledor taon 2019.[1] Kan 2016, an saiyang usipon na Abo sa Pag-gabas nagin pinalista man sa Premio Tomas Arejola para sa Literaturang Bikolnon.[2] Siya myembro kan Parasurat Bikolnon asin nagin saro sa mga board member kaini (2019-2020).

Si Aquino bilang panelista sa Saringsing Bikol Writers Workshop 2019

Sarô siya sa mga nagin partisipante o katood na parasurat kan Global GRACE - University of the Philippines National LGBTQ Writers Workshop kan 2018. Bago kaini, nagpartisipar siya sa Saringsing Writers Workshop 2016 asin sa CBSUA Writers Workshop kan 2015 na ginigibo sa Sentral na Bikolanong Unibersidad nin Estado kan Agrikultura (CBSUA) sa banwaan nin Calabanga, Camarines Sur kun sain siya nagtapos nin kolehiyo. Nag-atendir man siya sa pinakainot na Saling-Panitik Bienvenido Lumbera Translation Seminar-Workshop poon Pebrero 8-10, 2018 na ginibo sa Unibersidad kan Filipinas, Diliman, Syudad nin Quezon.[3][4]

Ipinublikar nin surusadiri an saiyang pinakainot na libro na igwang titulong Rigsok asin iba pang kinabanon na ramiram, sarong katiriponan nin mga rawitdawit sa Bikol Sentral sa Better Living Through Xeroxography Naga kan 2017. An saiyang mga rawitdawit nagluwas man sa Girok: erotika (2017), an pinakainot na antolohiya nin mga erotikang Bikol na pinublikar kan Kabulig-Bikol, Ani 40: Katutubo (2018) na pinagpupublikar kan Sentro Pangkultura kan Filipinas (CCP), asin sa Bikol BKL/Bakla (2019), sarong antolohiya nin mga panurat nin mga baklang Bikolnon. Nagin paraambag man siya bilang parapalis sa tataramon na Bikol sa Pagkamuot: mga Binirikol na Usipon gikan sa Europa, sarong antolohiya nin mga Europyanong halipot na usipon na ipinalis sa tataramon na Bikol.

Toltolan[baguhon | baguhon an source]

  1. A writer’s discovery of his Bikol soul Inquirer.net (pighugot 2019-9-1)
  2. Premyo Arejola short-listed entries announced Panitikan.ph (pighugot 2019-9-1)
  3. Bicolanos attend Saling Panitik at UP Diliman Bicol Standard (pighugot 2019-8-23)
  4. A Big Boost for Translation Panitikan.ph (pighugot 2019-8-23)